ປະຫວັດວິທະຍາໄລຄູປາກເຊ

ວິທະຍາໄລຄູປາກເຊ ເປັນສະຖາບັນການສຶກສາສ້າງຄູ ທີ່ໄດ້ຮັບການເນີດກໍ່ຕັ້ງຂຶ້ນ ໃນປີ 1962ຢູ່ບໍລິເວນບຶງໜອງຜືຢູ່ແຄມຖະໜົນເລກທີ13ໃຕ້, ຫ່າງຈາກເທບສະບານເມືອງປາກເຊທາງທິດ ຕາເວັນອອກ ສ່ຽງໃຕ້ 3 ກມ, ທິດເໜືອຕິດກັບບ້ານສ້າງທ່ຽງ, ທິດໃຕ້ຕິດກັນເສັ້ນ ທາງເລກທີ 13 ບ້ານສະໜາມໄຊ, ທິດຕາເວັນອອກຕິດກັບບ້ານໂຊກອຳນວຍ, ທິດຕາເວັນຕົກຕິດກັບບ້ານໂນນດູ່ ຂອງເມືອງປາກເຊ ແຂວງຈຳປາສັກ, ໃນເບື້ອງຕົ້ນມີເນື້ອທີ່ທັງໝົດ 4,2 ເຮັກຕາ ມາເຖິງປະຈຸບັນບັນມີເນື້ອທີ່ 16 ເຮັກຕາ.

ສະຖາບັນແຫ່ງນີ້ໄດ້ຖືກກໍ່ສ້າງດ້ານໂຄງລ່າງພື້ນຖານຂື້ນໃນປີ 1962 ພ້ອມດຽວກັນກັບການສ້າງຕັ້ງສູນການສຶກສາທ້ອງຖິ່ນ ທີ່ຮັບຜິດຊອບຝຶກອົບຮົມວິຊາຄູ ໄລຍະສັ້ນໃນຍາມພັກຊິ້ນປີຮຽນໃຫ້ແກ່ຄູສອນທີ່ບໍ່ໄດ້ຜ່ານໂຮງຮຽນສ້າງຄູ ເພື່ອເປັນຄູສອນຊັ້ນປະຖົມຕອນຕົ້ນ(ປໍ1-ປໍ3)ໃຫ້ແກ່ຄູສອນໃນ 7 ແຂວງ ຄື: ແຂວງຄໍາມ່ວນ, ສະຫວັນນະເຂດ, ວາປີຄໍາທອງ, ສາລະວັນ, ເຊໂດນ, ສີພັນດອນ ແລະ ແຂວງອັດຕະປື, ໃນປີນີ້ເອງ ສູນດັ່ງກ່າວກໍໄດ້ຮັບເອົານັກຮຽນຄູ ຊຶ່ງເອີ້ນວ່າລະບົບເລັ່ງລັດຮຽນລະ ບົບຫຼັກສູດ 2 ປີ (ລະບົບ 6+2) ເປັນລຸ້ນທຳອິດ,ໂດຍແມ່ນ ທ່ານຄູ ຈາຍ ສິດທິສັກ ເປັນຜູ້ອຳນວຍ ການສູນນີ້ ເປັນຄົນທຳອິດ.

ມາຮອດປີ 1965 ໄດ້ມີດໍາລັດລັດຖະມົນຕີ ສະບັບເລກທີ 524/PC,ລົງວັນທີ 8 ກັນຍາ 1965 ໄດ້ຕົກລົງເອົາສູນການສຶກສາທອ້ງຖິ່ນ ສ້າງເປັນ ວິທະຍາໄລຄູປາກເຊ ຢ່າງເປັນທາງການ ແລະ ສົມບູນແບບ ແລະ ກໍໄດ້ເປີດຮັບນັກຮຽນຄູ ລະບົບປົກກະຕິ ຫຼັກສູດ 4 ປີ ເປັນລຸ້ນທຳອິດ ແລະ ຮັບນັກຮຽນຄູ ລະບົບ 2 ປີ ເປັນລຸ້ນທີ 4.

ເຖິງແມ່ນວ່າດໍາລັດຂອງລັດຖະມົນຕີ ໄດ້ຕົກລົງສ້າງ ວິທະຍາໄລຄູປາກເຊ ເປັນທາງການໃນປີ 1965 ກໍຈິງແຕ່ສະຖາບັນແຫ່ງນີ້ພັດຮັບການກໍ່ສ້າງຄູລຸ້ນທຳອິດ ໃນປີ 1962, ດັ່ງນັ້ນ,ຈຶ່ງເຫັນດີຖື ເອົາປີຮັບເອົານັກຮຽນຄູລຸ້ນທຳອິດຂອງສະຖາບັນມາເປັນປີກຳເນີດການກໍ່ຕັ້ງ ວິທະຍາໄລຄູປາກເຊ ໃນປີ 1962 ນັ້ນເອງ, ຈຶ່ງນັບວ່າມາຮອດປີ 2012 ເປັນປີກຳເນີດການກໍ່ຕັ້ງ ຄົບຮອບ 50 ປີພໍດີ.

ພາລະບົດບາດໜ້າທີ່ວິທະຍາໄລຄູປາກເຊ ສະໄໝນັ້ນແມ່ນການສ້າງຄູສອນໃນ 2 ລະ ບົບຄື: ສ້າງຄູສອນຊັ້ນປະຖົມຕົ້ນ( ປໍ 1 – ປໍ 3) ຊຶ່ງເອີ້ນກັນວ່າເປັນ ລະບົບເລັ່ງລັດ ຮັບນັກຮຽນຈົບປະຖົມປີທີ 6 ມາຮຽນໃນຫຼັກສູດຮຽນ 2 ປີ (ລະບົບ 6+2) ເມື່ອຮຽນຈົບຈະທຽບຊັ້ນເປັນຄູຊັ້ນຕີ 7. (ຂອງລະບົບການທຽບຊັ້ນສຶກສາລະບອບເກົ່າ) ແລະ ສ້າງຄູສອນຊັ້ນປະຖົມປາຍ (ປໍ 4- ປໍ6 ), ເອີ້ນວ່າລະບົບປົກກຕິຮຽນຫຼັກສູດ 4 ປີ ລະບົບ(6+4) ເມື່ອຮຽນຈົບຈະທຽບຊັ້ນເປັນຄູຊັ້ນໂທ 2.

ນັບແຕ່ປີ 1965 ເປັນຕົ້ນມາໂຮງຮຽນແຫ່ງນີ້ ໄດ້ມີການເຕີບໃຫຍ່ ຂະຫຍາຍຕົວ ເນື້ອຖືກ ຂະຫຍາຍອອກ ແລະ ອາຄານໄດ້ສ້າງຂື້ນໃໝ່ຫຼາຍຫຼັງ, ຕຶກບໍລິຫານ ຫຼື ຫ້ອງການໄດ້ສ້າງສຳເລັດໃນປີ 1969 ຊຶ່ງປະກອບມີຫ້ອງຮຽນບັນຈຸຢູ່ນຳ 5 ຫ້ອງ, ມີອາຄານຫຼັງໄມ້ 4 ຫຼັງ ມີ 15 ຫ້ອງຮຽນ,ໃນປີ 1967 ໄດ້ສຳເລັດການກໍ່ສ້າງຫໍພັກກໍ່ 2 ຊັ້ນໃຫ້ນັກຮຽນຄູຊາຍ 2 ຫຼັງ ແລະ ປີ 1968 ໄດ້ສໍາເລັດການກໍ່ສ້າງຫໍພັກ 2 ຊັ້ນໃຫ້ນັກຮຽນຄູຍິງຕື່ມອີກ 1 ຫຼັງ. ມີຫໍອາຫານ 1 ຫຼັງ, ເຮືອນພັກຄູ 4 ຫຼັງ. ປີ 1970 ຫ້ອງທົດລອງວິທະຍາສາດ ທີ່ສ້າງສຳເລັດ ແລະ ກໍເປັນຫ້ອງທົດລອງທີ່ທັນສະໄໝໃນຂອງປະເທດສະໄໝນັ້ນ, ນອກນັ້ນຍັງມີຮ້ານກິນດື່ມ 2 ແຫ່ງ ເພື່ອສະໜອງບໍລິການໃຫ້ຄູ ແລະນັກຮຽນໃນຊົ່ວໂມງຫວ່າງ, ມີໂຮງໝໍ, ມີໂຮງໄຟຟ້າ, ມີເດີ່ນບານເຕະ, ເດີນບານບ້ວງ, ມີເດີນສວນຄົວ, ມີຫ້ອງປະຕິບັດການຊ່າງ ເພື່ອໄດ້ຝຶກແບບໃຫ້ນັກຮຽນຄູໄດ້ປະຕິບັດຕົວຈິງ.

ປີ 1970 ໄດ້ສ້າງຕັ້ງໂຮງຮຽນປະຖົມສາທິດ ມີ 6 ຫ້ອງ, ປໍ1-ປໍ6 ໂດຍແມ່ນ ທ່ານ ຍານາງ ອຳພອນ ແກ້ວຫຼວງໂຄດ ເປັນຫົວໜ້າໝວດໂຮງຮຽນ, ໂຮງຮຽນດັ່ງກ່າວໄດ້ເຂົ້າໄດ້ບັນຈຸນັກຮຽນເຂົ້າຮຽນປີທຳອິດ 224 ຄົນ. ນັບແຕ່ ປີ 1966-1970 ແມ່ນທ່ານ ອຸດອນ ວາລິນທະສັກ ເປັນຜູ້ອຳນວຍການ ແລະ ແຕ່ປີ 1971-1973 ແມ່ນ ທ່ານອວດ ອຸລາຈິດ ເປັນຜູ້ອຳນວຍການ.

ໃນປີ 1973 ໄດ້ມີ ນັກສຶກສາທັງ ໝົດ 616 ຄົນ,ຍິງ 171 ຄົນ,ນັກສຶກສາປີສຸດທ້າຍລະບົບ 4 ປີມີ 89 ຄົນ ແລະ ລະບົບ 2 ປີ 32 ຄົນ.

ມາຮອດປີ 1974 ວິທະຍາໄລຄູປາກເຊ ໄດ້ຂະຫຍາຍໂອກາດ ສ້າງຄູລະດັບຊັ້ນໂທ 6, ລະບົບ 9+3 ໝາຍຄວາມວ່າຮັບເອົານັກຮຽນຈົບຈາກມັດທະຍົມ ມາຮຽນ 3 ປີ ໃນສາຍຄູຄະນິດສາດ ແລະ ສາຍຄູ ວິທະຍາສາດທຳມະຊາດ ຊຶ່ງແຕ່ ປີ 1974-1976 ທ່ານ ເຕັງ ໂພຄຳ ເປັນຜູ້ອຳນວຍການ.

ພາຍຫຼັງປະເທດຊາດໄດ້ຮັບການປົດປ່ອຍ, ສະຖາປານາເປັນສາທາລະນະລັດປະຊາທິ ປະໄຕປະຊາຊົນລາວໃນປີ 1975, ໂດຍສືບຕໍ່ປະຕິບັດນະໂຍບາຍການສ້າງຄູຂອງສູນກາງ ຫຼື ກະຊວງສຶກສາ ໄດ້ວາງອອກ, ໃນປີ 1977 ວິທະຍາໄລຄູປາກເຊ ໄດ້ຖືກແຍກອອກເປັນ 2 ໂຮງຮຽນສ້າງຄູ ທີ່ມີລະບົບການບໍລິຫານເອກະລາດຕ່າງກັນ ຄື: ໂຮງຮຽນສ້າງຄູປະຖົມ ທີ່ຂື້ນກັບ ຄວາມຮັບຜິດ ຊອບຂອງສຶກສາແຂວງຈຳປາສັກ ມີໜ້າທີສ້າງຄູສອນສະເພາະຊັ້ນປະຖົມ ສ່ວນສ້າງຄູສອນ ຊັ້ນມັດທະຍົມຕົ້ນ ປ່ຽນຊື່ເປັນສ້າງຄູຊັ້ນກາງເລກ 6 ທີ່ຂື້ນ ກັບຄວາມ ຮັບຜິດຊອບຂອງກົມສ້າງຄູ ກະຊວງສຶກສາທິການໂດຍກົງທາງດ້ານວິຊາການ.

ສຳຫຼັບສ້າງຄູປະຖົມ ໄດ້ກໍ່ສ້າງຄູ ໃນລະບົບຮຽນຕ່າງໆ ຄື:

– ປີ 1977-1984 ສ້າງຄູລະບົບ 5+2;

– ປີ 1984-1985 ສ້າງຄູລະບົບ 8+1 ແລະ ລະບົບເລັ່ງລັດ 6+1

– ປີ 1985-1987 ສ້າງລະບົບ 8+2

– ປີ 1988-1993 ສ້າງຄູລະບົບ 8+3

– ຊຶ່ງມີຜູ້ອຳນວຍການແຕ່ລະໄລຍະຕິດຕໍ່ກັນດັ່ງນີ້

ທ່ານ ກາລີ ກວນເມືອງກາງ, ທ່ານທອງໄສ ບຸດດາສອນ, ທ່ານບຸນເພງ ຄຳພູນບຸຜາ, ທ່ານ ຄຳສຸກ ໃສມະນີ ແລະ ທ່ານກິແກ້ວ ຈັນທະວົງ

ສຳຫຼັບສ້າງຄູຊັ້ນກາງເລກ 6 ນັບແຕ່ ປີ 1977 ເປັນຕົ້ນມາ ໄດ້ສ້າງຄູເປັນສາຍຮຽນ ໃນລະບົບ ຕ່າງໆ ດັ່ງນີ້:

– ປີ 1977-1987 ສ້າງຄູ ລະບົບ 8+3 ໃນສາຍຄູ ທໍາະຊາດ, ສາຍຄູສັງຄົມ

– ປີ 1987 ສ້າງຄູ ປະຖົມ ລະບົບເລ່ງລັດ 11+1

– ປີ 1988-1993 ສ້າງຄູລະບົບ 11+3 ໃນ 5 ສາຍຮຽນ ຄື: ສາຍຄະນິດສາດ-ຟີຊິກສາດ, ເຄມີສາດ -ຊີວະສາດ, ວັນນະຄະດີ-ພາສາລາວ, ພູມສາດ-ປະຫວັດສາດ ແລະ ພາສາລັດເຊຍ.

– ຜູ້ອຳນວຍການໂຮງຮຽນສ້າງຄູເລກ 6 ມີ:

ທ່ານ ຄຳສອນ, ທ່ານ ພົມມາ ສຸນຍະລາ, ທ່ານ ອ່ອນເນື້ອ ພົມມະຈັນ, ທ່ານ ສີບຸນເຮືອງ ວຽນເຮືອງໄຜ່

ອິງຕາມຂໍ້ຕົກລົງຂອງລັດຖະມົນຕີກະຊວງສຶກສາວັດທະນະທຳ ແລະ ກິລາ ສະບັບເລກທີ 226 /ສວກ/1989,ລົງວັນທີ 29 ມີນາ 1989 ວ່າດ້ວຍການອະນຸມັດໃຫ້ເປີດລະບົບການກໍ່ສ້າງຄູມັດທະຍົມ ລະບົບ 11+3 ນັບແຕ່ປີນັ້ນມາ ໂຮງຮຽນສ້າງຄູປະຖົມແຂວງຈຳປາສັກ ແລະ ໂຮງຮຽນສ້າງຄູຊັ້ນກາງເລກ 6 ຈຶ່ງໄດ້ກະກຽມການໂຮມເຂົ້າກັນ ຈົນຮອດປີ 1992 ການໂຮມ 2 ໂຮງຮຽນສ້າງຄູ ຈຶ່ງໄດ້ສຳເລັດ ແລະ ປ່ຽນຊື່ມາເປັນ “ວິທະຍາໄລຄູປາກເຊ” ຈົນເຖິງປະຈຸບັນນີ້ ນັບແຕ່ປີ 1992 ວິທະຍາໄລຄູປາກເຊໄດ້ຖືກ ປັບປຸງດ້ານໂຄງລ່າງ ໂດຍແມ່ນໂຄງການປັບປຸງຄຸນນະພາບການສຶກສາໄລຍະທີ 1, ຊຶ່ງໄດ້ສ້ອມແປງ ຫ້ອງການ,ຫໍພັກ, ແລະ ປຸກສ້າງຫ້ອງຮຽນ 2 ຊັ້ນ 2 ຫຼັງ,ຫ້ອງສະໝຸດ.. ພ້ອມດຽວກັນກໍໄດ້ຈັດການຮຽນການສອນໄປຕາມຫຼັກສູດໃໝ່ທີ່ທາງ ກົມສ້າງຄູໄດ້ສ້າງຂື້ນ ຄື ຫຼັກສູດສ້າງຄູຊັ້ນສູງລະບົບ 11+3 ແລະ ສ້າງຄູຊັ້ນກາງ ລະບົບ 11+1 ແລະ 11+2 ໃນສາຍຄູຕ່າງໆ ດັ່ງນີ້:

ຄູສາຍຄະນິດສາດ
ວິທະຍາສາດທຳມະຊາດ
ຄູສາຍພາສາລາວ-ວັນນະຄະດີ
ຄູວິທະຍາສາດສັງຄົມ
ຄູສາຍພາສາອັງກິດ
ຄູພາສາຝຣັ່ງ ເລີ້ມແຕ່ປີ 2007-2008

– ໄດ້ສ້າງຄູລະດັບຊັ້ນກາງ ລະບົບ 11+1 ແລະ ລະບົບ 11+2 ດັ່ງນີ້:

ຄູປະຖົມ ນັບແຕ່ ປີ 1989-1990
ຄູອະນຸບານ ນັບແຕ່ປີ 2009-2010

– ຈັດການຮຽນການສອນພາກຄ່ຳ ເລີ້ມແຕ່ປີ 1999 ແລະ ພາກວັນເສົາ ອາທິດ 2004

– ຈັດການຮຽນການສອນ ລະບົບ 12+2; 12+4; 12+5 ແລະ ລະບົບຕໍ່ເນື່ອງ 11+3+2 ໃນພາກປົກກະຕິ ແລະ ຍາມພັກສີ້ນປີຮຽນ.

ຜູ້ອຳນວຍການໄລຍະນີ້ ມີທ່ານ ສີບຸນເຮືອງ ວຽນເຮືອງໄຜ່, ທ່ານ ບົວແກ້ວ ສຸດທິຈັກ ແລະ ທ່ານ ຄຳພຽນ ເມກຈອນ ຜູ້ປະຈຸບັນ.

ຕະຫຼອດໄລຍະການສ້າງຄູໃນ 2 ລະບອບ ຜ່ານມາ ໂດຍສະເພາະ ພາຍຫຼັງປະເທດຊາດ ໄດ້ຮັບການປົດປ່ອຍ ວິທະຍາໄລຄູປາກເຊ ເຮັດໜ້າທີ່ ການເມືອງຢ່າງ ສົມກຽດໄດ້ສ້າງຄູ ແລະ ຊັບພະຍາກອນມະນຸດໃຫ້ແກ່ປະເທດຢ່າງຫຼວງຫຼາຍ ໂດຍສະເພາະໃນ 4 ແຂວງພາກໃຕ້.

ໄດ້ຮັບນັກສຶກສາຄູເຂົ້າມາຮຽນ ແມ່ນໄດ້ປະຕິບັດຕາມຕາມຕົວເລກ ແບ່ງປັນຂອງກະ ຊວງສຶກສາທິການ ແລະ ກິລາໄດ້ກຳນົດໃຫ້, ໃນລະບົບ 8+3 ນັບແຕ່ປີ 1995 ລົງໄປ ສ່ວນໃຫຍ່ ຈະມາຈາກການສັບບຊ້ອນຂອງແຂວງໄດ້ຮັບທືນລັດຖະບານທັງໝົດ, ພາຍຫຼັງໄດ້ສ້າງຄູ ລະບົບ 11+3 ເປັນຕົ້ນມາ ການຮັບນັກຮຽນຄູໃນ 3 ຮູບແບບ ຄື: ຮັບຈາກການສັບຊ້ອນ ຂອງສຶກສາທິການແຂວງ ແຕ່ລະແຂວງ, ຮັບຈາກຈັດການສອບເສັງຄັດເລືອກ ແລະ ຮັບຈາກການນະ ໂຍບາຍ ເຂົ້າຮຽນ. ນອກນັ້ນ,ເພື່ອເປັນການປະຕິບັດນະໂຍບາຍການສະໜອງຄູໃນເຂດຮ່າງໄກທຸລະກັນດານ ວິທະຍາ ໄລຄູປາກເຊຍັງໄດ້ຮັບນັກສຶກສາຈາກທືນຈາກອົງການສາກົນຕ່າງໆໃນເມືອງທີ່ຂາດຄູ.

ຕະຫຼອດ 50 ປີ ຜ່ານມາ ວິທະຍາໄລຄູປາກເຊ ໄດ້ສ້າງຄູທີ່ຈົບອອກໄປຮັບໃຊ້ຊາດ ທັງໝົດບໍ່ຕ່ຳກ່ວາ 33.000 ຄົນ,ບຸກຄະລາກອນທີ່ຖືກສ້າງໄດ້ອອກຮັບຊາດ ເກືອບວ່າມີ ໃນທຸກຂະແໜງການຂອງພັກ,ຂອງລັດ ຊຶ່ງມີຕຳແໜ່ງໃນລະດັບສູງຂັ້ນສູນກາງ, ຂັ້ນການ ນຳລະດັບແຂວງ,ລະດັບເມືອງ ,ພະແນກການ ຕະຫຼອດອົງການຈັດຕັ້ງຕ່າງຂອງພັກ-ລັດຢ່າງ ຫຼວງຫຼາຍ.

ດ້ານບຸກຄະລາກອນ ພະນັກງານຄູອາຈານ ໄດ້ຮັບການພັດທະນາ ຍົກລະດັບສູງຂື້ນທັງພາຍໃນ ແລະຕ່າງປະເທດ, ທາງດ້ານທິດສະດີການເມືອງ, ດ້ານວິຊາການ ແລະ ດ້ານພາສາຕ່າງປະເທດ ໂດຍຈັດບຳລຸງພາສາອັງກິດ,ພາສາຫວຽດນາມໃຫ້ແກ່ຄູອາຈານ.ຈາກເບື້ອງຕົ້ນເຫັນວ່າຄູສ່ວນຫຼາຍມີລະດັບຄູຊັ້ນກາງເທົ່ານັ້ນສອນໃນວິທະຍາໄລຄູປາກເຊ ແຕ່ມາເຖິງປະຈຸບັນມີຄູສອນໃນລະດັບປະ ລິນຍາເອກ 1 ຄົນ, ປະລິນຍາໂທ ກວມເຖິງ 25% ,ປະລິນຍາຕີ ກວມ 70% ແລະ ຊັ້ນສູງ ແລະ ຊັ້ນກາງ 5%. ປະຈຸບັນມີຄູ-ອາຈານ ທີ່ກຳລັງຍົກລະດັບທັງໝົດ 12 ຄົນ, ຍິງ 5 ຄົນ (ປະລິນຍາເອກ 1 ຄົນ, ຍິງ 0 ຄົນ; ປະລິນຍາໂທ 6 ຄົນ, ຍິງ 1 ຄົນ; ປະລິນຍາຕີ 3 ຄົນ, ຍິງ 3 ຄົນ; ຊັ້ນສູງ 1 ຄົນ,ຍິງ 0 ຄົນ).

ດ້ານການຈັດການຮຽນການສອນ ວິທະຍາໄລຄູປາກເຊ ໄດ້ເອົາໃຈໃສ່ ປະຕິບັດການຮຽນ ການສອນຕາມຫຼັກສູດການສ້າງຄູລະບົບຕ່າງໆ ໄປຕາມສະພາບຄວາມຮຽກຮ້ອງຕ້ອງການຂອງສັງຄົມ ທີ່ກະຊວງສຶກສາທິການ ແລະ ກິລາໄດ້ກຳນົດໃຫ້ ໄດ້ຈັດການຮຽນການສອນໂດຍ ເນັ້ນໃຫ້ ໄດ້ຕາມ 3 ລັກສະນະ ແລະ ຕາມ 5 ຫຼັກມູນການສຶກສາຂອງພັກ, ເນັ້ນການຮຽນທິດ ສະດີຕິດພັນ ກັບຕົວຈິງ, ໃຫ້ນັກຮຽນໄດ້ມີໂອກາດຝຶກປະຕິບັດໃນພາກສະໜາມ, ຕິດພັນກັບໂຮງຮຽນສາມັນ ແລະ ຕິດພັນກັບ ທ້ອງຖິ່ນຊຸມຊົນ. ນອກຈາກການຈັດການຮຽນການສອນໃນພາກກາງເວັນແລ້ວ ນັບແຕ່ປີ 1999 ໄດ້ເປີດການຮຽນການສອນພາສາອັງກິດພາກຄ່ຳ ແລະ ປີ 2004 ໄດ້ເປີດ ການຮຽນການ ສອນພາກ ວັນເສົາ-ອາທິດ ໃຫ້ແກ່ພະນັກງານ ແລະນັກສຶກສາທີ່ຕ້ອງການ ຍົກລະດັບພາສາຕ່າງປະເທດ ແລະ ຍົກລະດັບຊັ້ນກາງເປັນຊັ້ນສູງ ໃນສາຍດັ່ງກ່າວ ມີຜູ້ສຳເລັດການສຶກສາ ໄປທັງໝົດ 3.750 ຄົນ, ຈາກນັ້ນຍັງໄດ້ຈັດການຮຽນ-ການສອນລະບົບຕໍ່ເນື່ອງ ໃຫ້ ແກ່ຄູສອນບໍ່ຖືກຊັ້ນ ແລະ ຄູທີ່ບໍ່ມີໂອກາດ ມາດຮຽນໃນລະບົບປົກກະຕິ ນັບແຕ່ປີ 2006-2007 ເປັນຕົ້ນມາ,ຊຶ່ງມີນັກ ສຶກສາ ທັງໝົດ 8.450 ຄົນ.

ຄຽງຄູ່ກັບການກໍ່ສ້າງຄູແລ້ວ ວິທະຍາໄລຄູປາກເຊ ຍັງໄດ້ຮ່ວມກັບກະຊວງສຶກສາທິການ, ພະແນກ ສຶກສາທິການແຂວງຕ່າງໆ ຈັດຕັ້ງການບຳລຸງຍົກລະດັບຄູປະຈຳການສາຍສາມັນ ຜູ້ທີ່ບໍ່ທັນ ໄດ້ມາດຕະຖານ ໃນແຂວງຈຳປາສັກ ແລະ ແຂວງເຊກອງ ແລະ ແຂວງອັດຕະປືອີກດ້ວຍ.

ໃນການຈັດການຮຽນການສອນທາງວິທະຍາໄລຄູພວກເຮົາໄດ້ສະໜອງສິ່ງອຳນວຍຄວາມ ສະດວກ ຕ່າງໆ ໃຫ້ແກ່ນັກສຶກສາໄດ້ມີໂອກາດຄົ້ນຄວ້າຮ່ຳຮຽນຢ່າງເຕັມສັກກາຍະພາບ, ສ້າງເງື່ອນໄຂໃຫ້ໄດ້ຝຶກປະ ຕິບັດ ໃຫ້ຫຼາຍໃນພາກຕົວຈິງ ໂດຍມີພື້ນຖານໂຄງລ່າງ ເຊັ່ນ: ອາຄານຮຽນ 8 ຫຼັງ, ຫໍພັກນັກສຶກສາ 7 ຫຼັງ, ເຮືອນພັກຄູ 10 ຫຼັງ,ສູນຜູ້ບໍລິຫານ 1 ຫຼັງ, ເຮືອນຄົວລວມ, ສະ ໜາມກິລາ, ຮ້ານກິນດື່ມ, ຫ້ອງທົດ ລອງວິທະຍາສາດທຳມະຊາດ, ວິຊາຟີສິກ, ເຄມີ ແລະ ຊີວະສາດ, ມີຫ້ອງຝຶກປະຕິບັດຟັງສຽງ, ຫ້ອງ ສະໝຸດ, ສູນພັດທະນາຄູ, ຫ້ອງອິນເຕີແນັດ, ລະບົບນ້ຳປະປາ ແລະ ໄຟຟ້າ, ພາຫະນະຮັບໃຊ້ ແລະ ອື່ນໆ.

ໄດ້ຈັດການຮຽນການສອນ ໄປຕາມຫຼັກສູດທີ່ທາງກົມສ້າງຄູ ກະຊວງສືກສາທິການ ແລະ ກິລາໄດ້ວາງອອກ ໃນລະບົບຕ່າງໆດັ່ງກ່າວມາໃນຂ້າງເທິງ ວິທະຍາໄລຄູປາກເຊຍັງໄດ້ຮ່ວມມືກັບອົງການສາກົນ ສະຖາບັນການສຶກສາຕ່າໆທັງພາຍໃນ ແລະ ຕ່າງປະເທດ ທັງນີ້ເພື່ອໃຫ້ຄູອາຈານ ແລະ ນັກສຶກສາໄດ້ແລກ ປ່ຽນຮຽນຮູ້ທາງດ້ານວິທະຍາສາດ-ວິທະຍາການ ແລະ ວັດທະນະທຳສັງຄົມ, ໄດ້ຮັບອາສາສະໝັກຈາກ ອົງ ການ VSO ຈໍານວນ 8 ຄົນ, ຈາກອົງການ ELIC ຈຳນວນ 9 ຄົນ, ຈາກອົງການ AUF , ALOFRASE ຈຳນວນ 9 ຄົນ, ຈາກ ອົງການ JICA ຈຳນວນ 3 ຄົນ ແລະ ຍັງໄດ້ແລກປ່ຽນ ວິຊາການມັດທະນາທຳ ກັບມະຫາວິທະຍາໄລ ຂອງສສ ຫວຽດນາມ ແລະ ລາດຊະອານາຈັກໄທ.

ຄູອາຈານໄດ້ເຂົ້າຮ່ວມຝຶກອົບຮົມພາຍໃນປະເທດ ຈຳນວນ 3.753 ເທື່ອຄົນ, ຕ່າງປະເທດ ຈໍານວນ 869 ເທື່ອຄົນເປັນຕົ້ນແມ່ນປະເທດ ສສ ຫວຽດນາມ, ປະເທດໄທ, ມາເລເຊັຍ, ສິງກະໂປ, ຍີ່ປຸ່ນ, ອອດສະເຕເຣຍ, ສະວີເດັນ, ຝຣັ່ງເສດ ແລະ ລັດເຊຍ.

ໄດ້ຮ່ວມມື ແລະ ເຊັນ MOU ຮ່ວມກັບມະຫາວິທະຍາໄລສ້າງຄູດານັງ, ວິທະຍາໄລຄູເທືອທຽນ ເຫວ້, ມະຫາວິທະຍາໄລຣາດຊະພັດສຸຣິນ ແລະ ສະຖາບັນການພາລະສຶກສາວິທະຍາເຂດສີ ສະເກດ ປະເທດໄທ.

ຄຽງຄູ່ກັບການຈັດການຮຽນການສອນພາຍໃນສະຖາບັນ ແລະ ການແລກປ່ຽນຮ່ວມມືກັບ ຕ່າງປະ ເທດ, ວິທະຍາໄລຄູປາກເຊຍັງໄດ້ເຄື່ອນໄຫວສັງຄົມນຳອຳນາດການປົກຄອງຂອງບ້ານ, ເມືອງ, ພະແນກ ການ ແລະ ຂອງແຂວງອີກດ້ວຍ ເຊ່ນ: ກ່ອນການປົດປ່ອຍ ຄູອາຈານພະນັກງານ ແລະ ນັກສຶກສາ ວິທະຍາໄລຄູປາກເຊ ເຂົ້າຮ່ວມຂະບວນການປະທ້ວງຢືດອຳນາດການປົກຄອງເກົ່າຂອງແຂວງເຊໂດນ, ໄດ້ຈັດສົ່ງຄູອາຈານລົງປຸກລະດົມບັ້ນແລກປ່ຽນເງິນທັງ 2 ຄັ້ງ, ໄດ້ເຂົ້າຮ່ວມຂະບວນການຕ້ານໄພແຫ້ງ ແລ້ງ ແລະ ຕ້ານນ້ຳຖ້ວມ, ຂະບວນການງານມະຫາກຳກິລາຂອງເມືອງ, ຂອງແຂວງ, ຂອງພະແນກການ ແລະ ຂອງສະຖາບັນຕ່າງໆ, ບັ້ນກອງປະຊຸມໃຫຍ່ຂອງອົງ ຄະນະພັກແຂວງ, ອົງຄະນະ ພັກເມືອງ ແລະ ບັ້ນເລືອກຕັ້ງສະພາແຫ່ງຊາດແຕ່ລະຊຸດ…

ໄດ້ສະໜອງງົບປະມານແລະທືນຮອນສະໜັບສະໜູນຊ່ວຍເຫຼືອສັງຄົມ, ຊ່ວຍເຫຼືອໂຮງຮຽນຕ່າງໆ, ຊ່ວຍເຫຼືອບ້ານໃນແຂວງຈຳປາສັກ, ແຂວງອັດຕະປືໃນແຕ່ລະປີ. ພ້ອມດຽວກັບ ກໍໄດ້ຈັດສົ່ງຄູ ອາຈານ ລົງຊ່ວຍການກໍ່ສ້າງກຸ່ມບ້ານພັດທະນາ, ບ້ານສາມສ້າງໃນປະຈຸບັນ. ພ້ອມດຽວ ກັນວິທະຍາໄລຄູປາກ ເຊຍັງໄດ້ຮັບການສະໜັບສະໜູນທືນ ແລະ ງົບປະມານ ໃນການປັບປຸງ ແລະ ພັດທະນາການສ້າງຄູ ຈາກ ທ່ານເຈົ້າເມືອງ ແລະ ທ່ານເຈົ້າ ແຂວງ 4 ແຂວງ ລວມທັງອົງການສາກົນອີກດ້ວຍ.

ຄຽງຄູ່ກັບການຈັດການຮຽນການສອນ, ໄດ້ຈັດຂະບວນເຄື່ອນໄຫວອອກແຮງານ, ເພີ້ມພູນຜະລິດ ຜົນ, ຂະບວນການກິລາກາຍຍະກຳ, ຂະບວນການສົ່ງເສີມສິລະປະວັນນະຄະດີ ແລະ ວັດທະນະທຳ ທັງ ພາຍ ໃນສະຖາບັນ, ນອກສະຖາບັນ ແລະ ນອກປະເທດ, ໄດ້ເອົາໃຈຢ່າງຕັ້ງໜ້າ ໃນການປະຕິບັດ 3 ຂໍແຂ່ງ ຂັ້ນຂອງກະຊວງສຶກສາທິການ ແລະ ກິລາວາງອອກ ແລະ ໃສ່ສົ່ງເສີມຂະບວນການປຸກຈິດສຳນຶກ ໃນການປົກປັກຮັກສາສະພາບແວດລ້ອມ ແລະ ສ້າງສະຖາບັນໃຫ້ ເປັນສະຖາບັນ ສີຂຽວ, ສະອາດງາມຕາ ຢູ່ສະເໝີ.

ໃນສົກຮຽນ 2012-2013 ນີ້, ວິທະຍາໄລຄູປາກເຊໄດ້ມີຄູອາຈານ ແລະ ພະນັກງານ ພາລະກອນ ທັງໝົດ 160 ຄົນ, ຍິງ 81 ຄົນ, ມີຄູສອນ 136 ຄົນ, ຍິງ 68 ຄົນ ແລະ ພະນັກງານບໍລິຫານ 24 ຄົນ, ຍິງ 13 ຄົນ. ໃນນີ້ພະນັກງານຄູອາຈານມີວຸດທິ ປະລິນຍາໂທ 20 ຄົນ, ຍິງ 7 ຄົນ; ປະລິນຍາຕີ 79 ຄົນ, ຍິງ 35 ຄົນ; ຊັ້ນສູງ 48 ຄົນ, ຍິງ 28 ຄົນ; ຊັ້ນກາງ 8 ຄົນ, ຍິງ 6 ຄົນ; ບໍ່ມີຊັ້ນ 5 ຄົນ, ຍິງ 4 ຄົນ. ນັກສຶກສາທັງໝົດ 2.336 ຄົນ,ຍິງ 1.430 ຄົນ

ຜົນງານບັນພົ້ນເດັ່ນໃນຜ່ນມາ:

ວິທະຍາໄລຄູປາກເຊໄດ້ຮັບການຍ້ອງຍໍຈາກ ການຳພັກ-ລັດຂັ້ນເທີງ ແລະສັງຄົມ ດັ່ງນີ້:

– ໄດ້ຮັບຫຼຽນໄຊແຮງງານຊັ້ນ II 1 ໜ່ວຍ

– ໄດ້ຮັບຫຼຽນໄຊແຮງງານຊັ້ນ III 1 ໜ່ວຍ

– ໃບຍ້ອງຍໍຂອງແຂວງ 5 ໃບ

– ໃບຍ້ອງຍໍລັດຖະມົນຕີກະຊວງສຶກສາທິການ 2 ໃບ

– ຮັບທຸງໄຊຊະນະເລີດ ກົມສ້າງຄູ 1 ຄັ້ງ

– ຮັບທຸງສະພາບແວດລ້ອມດີເດັ່ນ 2 ຄັ້ງ

– ໃບຍ້ອງຍໍຂອງເມືອງ 4 ໃບ

– ໃບຍ້ອງຍໍຊົມເຊີຍຈາກພະແນກການຕ່າງໆ 14 ໃບ

ຕະຫຼອດໄລຍະການກໍ່ສ້າງຄູຂອງວິທະຍາໄລຄູປາກເຊ ເຖິງຈະມີຜົນສຳເລັດຫຼາຍດ້ານ ຢ່າງໜ້າເພີ່ງພໍໃຈ ແຕ່ພວກຂ້າພະເຈົ້າຍັງມີຂໍ້ຫຍຸ້ງ ແລະ ອຸປະສັກໃນ ການພັດທະນາການສ້າງຄູ ອັນພື້ນຖານ ໂດຍສະເພາະແມ່ນໂຄ່ງລາງພື້ນຖານຍັງຈຳກັດ, ອາຄານຮຽນ, ຫໍພັກນັກສຶກສາ, ຫ້ອງການຄູແອອັດ, ຫ້ອງທົດລອງວິທະຍາສາດທຳມະຊາດ ແລະ ຫ້ອງພາສາຕ່າງປະເທດ, ບ່ອນປະຕິບັດການຊ່າງຂອງນັກສຶກສາຄູ,ຫ້ອງມູນເຊື້ອ ແລະສູນຄົ້ນຄວ້າແຫຼ່ງຂໍ້ມູນຂ່າວສານ ບໍ່ທັນພຽງພໍ ແລະ ບາງອັນກໍບໍ່ທັນມີ ແລະ ຖ້າມີກໍບໍ່ສອດຄ່ອງກັບຄວາມຕ້ອງ ການ ແລະ ການຂະຫຍາຍຂອງການສ້າງຄູໃນໄລຍະໃໝ່, ອັດຕາຄ່າເບ້ຍລ້ຽງນັກສຶກສາຄູຍັງຕໍ່າຫຼາຍ ຖ້າທຽບໃສ່ການຄອງຊີບໃນປະຈຸບັນ.

ວິໄສທັດ :

ວິທະຍາໄລຄະປາກເຊ

ສູນກາງການສຶກສາຄູ ກ້າວສູ່ຄວາມເປັນເລີດ

ຮັບໃຊ້ສັງຄົມ ເຊື່ອມໂຍງສາກົນ

ພາລະກິດ (Mission)

– ພັດທະນາວິທະຍາໄລຄູໃຫ້ກາຍເປັນສູນແຫ່ງຄວາມເປັນເລີດທາງຟີຊີກສາດ ແລະພູມສາດ

– ຮັບປະກັນໃຫ້ມີສີ່ງອຳນວຍຄວາມສາດວກໃຫ້ແກ່ການຮຽນຮູ້ໃນທຸກດ້ານ

– ສ້າງຂີດຄວາມສາມາດໃນການປະກັນຄຸນະພາບພາຍໃນ

– ພັດທະນາຂີດຄວາສາມາດໃຫ້ແກ່ຄູອາຈານໄດ້ຮັບການປະປຸງດ້ານການຮຽນ-ການສອນໃຫ້ດີ

ຂື້ນໂດຍຜ່ານການຄົ້ນຄ້ວາວິທະຍາສາດ,ວິໄຈ,ການສຶກສາການສອນ,ການວິໄຈໃນຫ້ອງຮຽນ,ສ້າງ

ແລະພັດທະນາຄູສູ່ຄວາມເປັນມືອາຊີບສາມາດເຊື່ອມໂຍງພາກພື້ນແລະສາກົນ.

ເປົ້າໝາຍ (GoAl)

ສ້າງວິທະຍາໄລຄູປາກເຊໃຫ້ກາຍເປັນສະຖາບັນສ້າງຄູກ້າວສູ່ຄວາມເປັນເລີດ(ທາງດ້ານຟິຊີກສາດ

ແລະພູສາດ)ໃນປີ 2020.

ສິດ ແລະ ພາລະບົດບາດ

ວີທະຍາໄລຄູປາກເຊ (ຂຽນຫຍໍ້ວ່າ ວຄປ)

ທີ່ຕັ້ງ

ວິທະຍາໄລຄູປາກເຊຕັ້ງຢູ່ແຄມຖະໜົນເລກທີ 13 ໃຕ້ ເຊິ່ງຫ່າງຈາກເທສະບານເມືອງປາກເຊທາງທິດຕາເວັນ ອອກສ່ຽງໃຕ້ 3 ກມ. ມີເນື້ອທີ່ 16 ເຮັກຕາ, ທິດເໜືອຕິດກັບບ້ານສ້າງທ່ຽງ, ທິດໄຕ້ຕິດກັບເສັ້ນທາງເລກທີ 13 ບ້ານສະໜາມໄຊ, ທິດຕາເວັນອອກຕິດກັບບ້ານໂຊກອຳນວຍ, ທິດຕາເວັນຕົກຕິດກັບບ້ານໂນນດູ່.

ພາລະບົດບາດ

ວິທະຍາໄລຄູປາກເຊ ເປັນສະຖານການສຶກສາວິຊາຄູ ພາຍໃຕ້ການຊີ້ນຳຂອງກົມສ້າງຄູ ກະຊວງສຶກສາທິການແລະກິລາ; ມີພາລະບົດບາດກໍ່ສ້າງ ແລະ ບຳລຸງຄູອະນຸບານ, ຄູປະຖົມ, ຄູມັດທະຍົມ ໃນລະດັບຊັ້ນກາງ, ຊັ້ນສູງ ແລະ ປະລິນຍາຕີ ໃຫ້ມີຄຸນສົມບັດ,ຄວາມຮູ້ ແລະຄວາມສາມາດ ເພື່ອສ້າງຄູໃຫ້ກາຍເປັນຄູມືອາຊີບ ແລະ ຕອບສະໜອງຄວາມຮຽກຮ້ອງຕ້ອງການໃນແຕ່ລະໄລຍະໃນ ການພັດທະນາເສດຖະກິດສັງຄົມຂອງຊາດ.

ຂອບເຂດບໍລິການ

ອີງຕາມພາລະບົດບາດ, ສິດ ແລະ ໜ້າທີ່ ວິທະຍາໄລຄູປາກເຊຮັບຜິດຊອບການກໍ່ສ້າງ ແລະ ບໍາລຸງຄູໃນ 2 ແຂວງຄື: ແຂວງຈຳປາສັກ ແລະ ແຂວງອັດຕະປື.ນອກຈາກນັ້ນຍັງຮັບການກໍ່ສ້າງໃນສາຂາວິຊາຕ່າງໆ ຕາມການມອບໝາຍຂອງກົມສ້າງຄູ ກະຊວງສຶກສາ ແລະ ກິລາ ແລະ ຮັບນັກສຶກສາ, ພະນັກງານບຳລຸງໃນຂອບເຂດທົ່ວປະເທດອີກດ້ວຍ.

ສິດ

ຈັ້ດຕັ້ງສອບເສັງ ແລະ ການຄັດເລືອກເອົານັກຮຽນເຂົ້າຮຽນຕາມລະບຽບການທີ່ຂັ້ນເທີງວາງອອກ.
ອອກປະກາສະນິຍະບັດຄູ ແລະອອກໃບຢັ້ງຢືນວິຊາຊີບຄູໃຫ້ ນັກສຶກສາຄູ ທີ່ຮຽນຈົບຫຼັກສູດຕາມທີ່ກໍານົດ.
ສະເໜີການບັນຈຸ,ຊັບຊ້ອນ,ແຕ່ງຕັ້ງ,ປະຕິບັດນະໂຍບາຍ,ຄູ້ມຄອງ,ຍ້ອງຍໍ, ຫຼື ປະຕິບັດປະບຽບວິໄນລັດຖະກອນຕາມພາລະບົດບາດຂອງຕົນ.
ບັນຈຸ,ຊັບຊ້ອນ,ແຕ່ງຕັ້ງ,ປະຕິບັດນະໂຍບາຍ,ຄູ້ມຄອງ,ຍ້ອງຍໍ, ຫຼື ປະຕິບັດປະບຽບວິໄນ ນັກຮຽນ ແລະ ນັກສຶກສາຂອງວິທະຍາໄລຄູ.
ຄູ້ມຄອງ ແລະ ນຳໃຊ້ລາຍຮັບ-ຈ່າຍຕາມລະບຽບຫຼັກການຂອງກະຊວງການເງີນວາງອອກ;
ອອກລະບຽບຄູ້ມຄອງພາຍໃນວິທະຍາໄລຄູເພີ່ມເຕີມ ເພື່ອໃຫ້ສອດຄ່ອງກັບສະພາບຄວາມເປັນຈິງ ບົນພື້ນຖານລະບຽບກົດໝາຍຂອງລັດ.
ປົກປ້ອງຜົນປະໂຫຍດສ່ວນລວມ ແລະ ລິຂະສິດຂອງວິທະຍາໄລຄູ.
ພົວພັນສົມທົບກັບອຳນາດການປົກຄອງທ້ອງຖີ່ນຂັ້ນຕ່າງໆທີ່ກ່ຽວຂ້ອງ ແລະ ບັນດາສະຖາບັນການສຶກສາຢູ່ພາຍໃນປະເທດ ເພື່ອຮ່ວມກັນເຄື່ອນໄຫວດ້ານວຽກງານດ້ານຕ່າງໆ ທີ່ເຫັນວ່າເໝາະສົມ ແລະ ສອດຄ່ອງຕາມລະບຽບຫຼັກການ. ໃນກໍລະນີ ທີ່ມີການພົວພັນຮ່ວມມືກັບສະຖາບັນການສຶກສາຢູ່ຕ່າງປະເທດ ຫຼື ອົງການຈັກຕັ້ງສາກົນໃດໜຶ່ງຕ້ອງໄດ້ສະເໜີ ແລະ ໄດ້ອະນຸມັດ ຈາກກະຊວງສຶກສາທິການຫຼືອົງການຈັດຕັ້ງຕ່າງໆ.
ປະຕິບັດສິດອື່ນໆ ທີ່ໄດ້ກຳນົດໄວ້ໃນລະບຽບກົດໝາຍ.

ສີ່ງທີ່ອຳນວຍຄວາມສະດວກ

– ສູນຝືກອົບຮົມແລະຜູ້ບໍລິຫານ

– ມີທີ່ພັກ,ຫ້ອງນອນແລະບໍລິການອື່ນໆ

– ຫ້ອງສມຸດ

– ຫ້ອງຄອມພິວເຕີ ແລະ ອີນເຕີເນັດ

– ຫ້ອງທົດລອງວິທະຍາສາດ(ເຄມີສາດ,ຊີວະສາດ,ຟີຊີກສາດແລະຫ້ອງສືການສອນ)

– ເຮືອນພັກຄູ-ອາຈານ

– ຫໍພັກນັກສຶກສາ(ຍີງ-ຊາຍ)

– ເດີນກິລາ

– ກາລາລົດຄູອາຈານ ແລະ ນັກສຶກສາ

ຄະນະຜູ້ບໍລິຫານວິທະຍາໄລຄູ

ຄະນະຜູ້ບໍລິຫານວິທະຍາໄລຄູ

ຜູ້ອຳນວຍການ 1 ທ່ານ ແລະ ຮອງຜູ້ອຳນວຍການ 3 ທ່ານ

ມີຜູ້ບໍລິຫານລະດັບຫ້ອງການ 10 ຫ້ອງການແລະ 33 ໜ່ວຍງານ

ລະດັບວິຊາສະເພາະຂອງພະນັກງານ:

ວິທະຍາໄລຄູປາກເຊມີອາຈານສອນທີ່ມີປະສົບການແລະສຳນິ ສຳນານຫຼາກ ຫຼາຍ ທີ່ຮຽນຈົບມາຈາກພາຍໃນ

ແລະ ຕ່າງປະເທດທັງມີລະດັບວຸດທິປະ ລິນຍາຕີ, ປະລິນຍາໂທ ແລະ ປະລິນຍາເອກ ນັບມື້ນັບເພີ້ມຂື້ນ ເຊິ່ງເປັນທ່າ

ແຮງທີ່ດີໃນການພັດທະຍາສະຖາບັນນັບມື້ນັບມີຄວາມກ້າວໜ້າ.

ຄຸນສົມບັດແລະຈັນຍາບັນ

ຄຸນທາດການເມືອງ:

ມີທັກສະນະຫຼັກໝັ້ນການເມືອງໜັກແໜ້ນ,ປະຕິບັດແນວທາງນະໂຍບາຍຂອງພັກ ແລະ ລັດຢ່າງຖືກຕ້ອງແລະປະດິດສ້າງ,

ປະຕິບັດລະບຽບກົດໝາຍຢ່າງເຂັ້ມງວດ,ຕັ້ງໜ້າຝຶກຝົນຫຼໍ່ຫຼອມຕົນເອງທາງດ້ານທິດສະດີການເມືອງເພື່ອນຳໃຊ້ເຂົ້າໃນການ

ປະຕິບັດໜ້າທີ່ການສີດສອນໃຫ້ມີຜົນສຳເລັດ.

ມີສະຕີຕໍ່ການຈັດຕັ້ງ,ປະຕິບັດໜ້າທີ່ຕາມການມອບໝາຍ,ມີສະຕີລວມໝູ່ແລະເພື່ອຜົນປະໂຫຍດລວມ.
ເປັນແບບຢ່າງໃນການປະຕິບັດພັນທະຂອງພົນລະເມືອງ,ຫ້າວຫັນປະກອບສ່ວນການເຄື້ອນໄຫວທາງການເມືອງແລະສັງຄົມ.

ຄຸນສົມບັດດ້ານອາຊີບ

ຮັກອາຊີບ,ມີສະຕິຮັກສາກຽດສັກສີແລະຈັນຍາປັນຂອງຄູ,ມີຄວາມສາມະຄີ,ມີນ້ຳໃຈເອື້ອເພື້ອເພື່ອແຜຕໍ່ເພື່ອນຮ່ວມອາຊີບ

,ມີນ້ຳໃຈມະນຸດສາທຳ,ມີມາລະຍາດອ່ອນຫວານ-ຄຽມຄົມຕໍ່ຜູ້ຮຽນແລະເພື່ອນຮ່ວມງານ,ມີຄວາມກຽມພ້ອມຊ່ວຍເຫຼືອຮັບໃຊ້,

ປົກປ້ອງສີດແລະຜົນປະໂຫຍດອັນຊອບທຳຂອງຜູ້ຮຽນ,ຂອງເພື່ອຮ່ວມງານແລະສັງຄົມ

ມີຄວາມດຸໝັ່ນຫ້າວຫັນຕໍ່ການປະຕິບັດໜ້າທີ່,ປະຕິບັດຕາມລະບອບ-ລະບຽບຂອງອົງການຈັດຕັ້ງ-ຂະແໜງການແລະສະຖານສຶກສາ.
ໃຫ້ການສຶກສາອົບຮົມແລະສີດສອນຢ່າງສະເໜີພາບ,ປະເມີນຕີລາຄາຢ່າງຖືກຕ້ອງເປັນທຳຕໍ່ຄວາມສາມາດຂອງຜູ້ຮຽນ.
ມີຄວາມຊື່ສັດບໍ່ລິສຸດ,ປະຢັດທ່ຽງທຳ,ຕ້ານການໂລບມາກໂລພາ,ສໍ້ລາດ-ບັງຫຼວງ,ຕ້ານພະຍາດອ້າງແຕ່ຜົນງານ,

ດຳເນີນການຕຳນິຕົນເອງແລະເພື່ອນຮ່ວມງານໃຫ້ປົກກະຕິ.

ເອົາໃຈໃສ່ຊອກຮູ້ຮຳຮຽນເພືອພັດທະນາຍົກລະດັບຕົນເອງດ້ານວິຊາສະເພາະ,ພາສາຕ່າງປະເທດ,ດ້ານຂໍ້ມູນຂ່າວສານ ແລະ

ເທັກໂນໂລຊີເພື່ອການປະຕິບັດໜ້າທີ່ທີ່ໄດ້ຮັບການມອບໝາຍໃຫ້ມີຜົນສຳເລັດສູງແລະໃຫ້ສາມາດຕອບສະໜອງໄດ້ຕາມຄວາມ

ຕ້ອງການຂອງການພັດທະນາການສຶກສາຂອງຊາດ

ແບບແຜນ ແລະ ການດຳນົງຊີວິດ

1.ດຳນົງຊີວິດຢ່າງມີອຸດົມການ,ມີຈຸດປະສົງ ເປົ້າໝາຍ,ມີຄວາມມານະອົດທົນຜ່ານຜ່າຄວາມຫຍຸ້ງຍາກ,ສູ້ຊົນດ້ວຍເຫງົ້າພະລັງໃສແຈ້ງແລະມີຈິດຕະນາການທີ່ປະດິດສ້າງ

2.ມີແບບແຜນດຳນົງຊີວິດແບບມະຫາຊົນ ເໝາະກັບລັກສະນະສີສັນຂອງຊົນເຜົ່າແລະຄວາມກ້າວໜ້າຂອງສັງຄົມຮູ້ຊຸກຍູ້ສົ່ງເສີມວາດດຳນົງຊີວິດແບບ

ສີວິໄລ-ກ້າວໜ້າແລະຮູ້ຕຳນິຕິຕຽນການ,ດຳນົງຊີວິດແບບຫຼ້າຫຼັງ-ຄັບແຄບ.

ມີແບບແຜນການເຮັດວຽກທີ່ວ່ອງໄວ,ຫ້າວຫັນ,ວິທະຍາສາດ,ສີວິໄລ,ສຸພາບຄ່ຽມຄົມໃນການພົວພັນສັງຄົມ,

ກັັບ້ພື່ອນຮ່ວມງານແລະຜູ້ຮຽນ,ແກ້ໄຂວຽກງານຢ່າງພະວະວິໃສ,ມີນ້ຳໃຈບຸກບືນແລະມີຄວາມລະອຽດອ່ອນ.

ນຸ່ງຖືສູພາບຮຽບຮ້ອຍ-ງາຍດາຍ,ແທດເໝາະກັບອາຊີບ,,ບໍ່ໂດດໂຜນ,ບໍ່ໂອອວດຕໍ່ຜູ້ຮຽນ.
ສາມັກຄີຊ່ວຍເຫຼືອເພື່ອນຮ່ວມງານເພື່ອພ້ອມກັນສຳເລັດໜ້າທີ່,ຕ້ານແລະສະກັດກັ້ນການກະທຳທີ່ຜີດຕໍ່ລະບຽບກົດໝາຍ.

ມີການພົວພັນຕິດແທດກັບປະຊາຊົນ ແລະ ຜູ້ປົກຄອງຢ່າງເໝາະສົມ.

ສ້າງຄອບຄົວວັດທະນາທຳ,ມີຄວາມນັບຖື-ຮັກແພງຊື່ງກັນແລະກັນຮູ້ຫ່ວງໄຍນຳຄົນອ້ອມຂ້າງແລະດຳນົງຊີວິດແບບ

ວັດທະນາທຳສີວິໄລໃນທີ່ສາທາລະນະ.ປົກປັກ

ຮັກສາມູນເຊື້ອຄຸນສົມບັດຂອງຄູ

ບໍ່ສວຍໃຊ້ໜ້າທີ່ຕຳແໜ່ງເພື່ອການກະທຳທີ່ຜີດຕໍ່ລະບຽບກົດໝ!ຍ,ບໍ່ສ້າງຄວາມຍຸ້ງຍາກໃຫ້ຜູ້ຮຽນ ແລະ ປະຊາຊົນ.
ບໍ່ລັກໂລບຫຼືສໍ້ໂກງໃນການສຶກສາຮຳຮຽນ,ການຄົ້ນຄ້ວາວິທະຍາສາດແລະການສີດສອນເພື່ອຜົນປະໂຫຍດຂອງຕົນເອງ.
ບໍ່ມີທ່າທີແຂງກະດ້າງບີບອັງຄັບຜູ້ຮຽນໃນທຸກຮູບແບບ,ບໍ່ປົກປິດດ້ານຫຍໍ້ທໍ້ໃນວຽກງານການສີດສອນແລະ

ການສຶກສາອົຍຮົມຜູ້ຮຽນແລະເພື່ອນຮ່ວມງານ.

ບໍ່ກະທຳສີ່ງທີ່ເຕະຕ້ອງເຖີງຮ່າງກາຍ-ຈິດໃຈແລະກຽດສັກສີຂອງຜູ້ຮຽນກໍ່ຄືບຸກຄົນອື່ນ.
ບໍ່ມີການສອນເພີ້ມ-ຮຽນເພີ້ມນອກຈາກລະບຽບການ.
ບໍ່ຄຸ້ມຄອງແລະນຳໃຊ້ສີ່ງເສບຕິດ,ບໍ່ດື່ມສີງມືນເມົາໃນການປະຕິບັດໜ້າທີ່ແລະໃນສີງສາທານະລະຊົນ.
ບໍ່ສ້າງກຸ່ມກ້ອນ,ພັກພວກທ້ອງຖີ່ນຫຼືການກະທຳອື່ນໆທີ່ພາໃຫ້ເກີດຄວາມແຕກແຍກຄວາມສາມັກຄີ.
ບໍ່ນຳໃຊ້ສະຖານທີ່ການສຶກສາເພື່ອດຳເນີນການໂຄສະນາຊວນເຊື່ອຮູບແບບຕ່າງໆທີ່ຝືນຕໍ່ທັດສະນະແລະ

ແນວທາງນະໂຍບາຍຂອງພັກ-ັລດ.

9.ບໍ່ເອົາຊັບສີນທີ່ເປັນຂອງສ່ວນລວມໄປໃຊ້ເພື່ອຜົນປະໂຫຍດບຸກຄົນ

ບໍ່ປະລະໜ້າທີ່,ຫຼົບຫຼີກມະຕິຄຳສັງແລະການເຄື້ອນໄຫວໄປໃນທາງທີ່ບໍ່ດີມີຜົນສະທ້ອນລົບຕໍ່ຊື່ສຽງ,ບົດບາດແລະ

ອິດທິພົນຂອງສະຖານການສຶກສາ.

ບໍ່ເຊື່ອຖືສີ່ງງົມງວຍ-ຫຼ້າຫຼັງ,ບໍ່ກະທຳສີ່ງທີ່ຜີດຕໍ່ຮີດຄອງປະເພນີອັນດີງາມຂອງຊາດ.

ຈັນຍາບັນຂອງຄູລາວ